Chuo Kikuu cha Lugha za Kigeni cha Beijing kipo kwenye barabara ya Xisanhuan, wilaya ya Haidian, mjini Beijing. Chuo hiki kinaongozwa na Wizara ya Elimu moja kwa moja na ni kimojawapo cha vyuo vikuu vilivyojengwa kwa awamu ya kwanza katika miradi ya “211”, “985” na “vyuo na mitalaa ya hali ya juu” ya kitaifa.

Chuo Kikuu cha Lugha za Kigeni cha Beijing kiliasisiwa mwaka 1941 ambapo kilikuwa idara ya Kirusi ya chuo kikuu cha kijeshi mjini Yan’an. Baada ya kuasisiwa kwa Jamhuri ya Watu wa China, chuo hiki kilikuwa chini ya uongozi wa Wizara ya Mambo ya Nje hadi mwaka 1980. Mnamo mwaka 1994, chuo hiki kilipandishwa hadhi kikawa Chuo Kikuu cha Lugha za Kigeni cha Beijing cha sasa.

Chuo hiki kinaongoza ufundishaji na utafiti wa lugha za kigeni nchini China kwa historia yake ndefu, wingi wa lugha za kusomesha na ukamilifu wa mitalaa. Hivi sasa chuo kikuu kinasomesha lugha 101 za kigeni ambazo zimejumuisha lugha zote rasmi za nchi zenye uhusiano wa kibalozi na China zikiwemo lugha mbalimbali za Ulaya, Asia na Afrika. Zaidi ya hayo, chuo hiki kinasomesha isimu na fasihi ya Kichina, uandishi na upashanaji wa habari, siasa na utawala, sheria, uchumi na biashara, menejimenti, elimu na mengineyo.

Hivi sasa wapo wanafunzi wa shahada ya kwanza 5,700, wanafunzi wa shahada za uzamili na uzamivu 4,300 na wanafunzi wageni 1,200. Chuo hiki kina walimu na wafanyakazi zaidi ya 1,300 pamoja na wataalamu 200 kutoka nchi 65 za dunia. Chuo kikuu kimeanzisha ushirikiano na vyuo vikuu na taasisi zaidi ya 300 kutoka nchi na kanda 80. Pia kinaendesha taasisi za Confucius 23 zilizopo katika mabara ya Asia, Ulaya na Amerika.

Chuo hiki kimejenga vituo mbalimbali vya utafiti kwa kufuata dira ya “lugha za dunia, tamaduni za dunia na usimamizi wa dunia”, kama vile Kituo cha Utafiti wa Uingereza, Kituo cha Utafiti wa Japani, Kituo cha Utafiti wa nchi za Afrika n.k. Pia chuo chetu kinahariri majarida 5 ya CSSCI, yaani “Foreign Language Teaching and Research”, “Foreign Literature”, “International Forum”, “Foreign Language Education in China” na “International Sinology”, pamoja na majarida mengine kama “African Language and Culture Studies”.

Chuo hiki kimekuwa kikienda sambamba na maendeleo ya taifa katika miaka 80 iliyopita na kimeandaa wahitimu mahiri wapatao elfu 100 wanaofanya kazi katika sekta za diplomasia, tafsiri, uchumi, biashara, vyombo vya habari, sheria, fedha n.k. Kwa mfano wa Wizara ya Mambo ya Nje ya China, inakadiriwa kuwa wapatao mabalozi 500 na waambata 3,000 na ushei walihitimu kutoka chuo hiki, ndiyo maana kimesifika kama ni “Mlezi wa Wanadiplomasia wa Jamhuri”.

Hivi sasa, chuo hiki kinafuata mwongozo wa Fikra za Xi Jinping kuhusu Ujamaa wenye Umaalumu wa Kichina kwa zama mpya na misingi ya Mkutano mkuu wa 20 wa Chama cha Kikoministi cha China huku kikidhamiria kujenga chuo kikuu cha hali ya juu duniani na kutayarisha wasomi wengi wenye uzalendo, uono wa kimataifa na umahiri ili watoe mchango mkubwa zaidi kwa kukuza uelewano na ushirikiano baina ya China na dunia!