2024 වසරේ අප්‍රේල් මස 29 වන දින, මෝල්ටාවේ අධ්‍යාපන, ක්‍රීඩා, තරුණ, පර්යේෂණ සහ නවෝත්පාදන අමාත්‍ය ක්ලිෆ්ටන් ග්‍රිමා මහතා බෙයිජිං විදේශ භාෂා විශ්වවිද්‍යාලයට පැමිණියේය. බෙයිජිං විදේශ භාෂා විශ්වවිද්‍යාලයේ කුලපති සහ විශ්වවිද්‍යාලයේ පාලන මණ්ඩලයේ උප සභාපති Jia Wenjian මහතා සහ විශ්වවිද්‍යාලයේ උප කුලපති Zhao Gang මහතා ක්ලිෆ්ටන් ග්‍රිමා ප්‍රමුඛ දූත පිරිස හමු වූහ.
ක්ලිෆ්ටන් ග්‍රිමා මහතා විසින් "කුසලතා සහිත තරුණයන්ගේ සම්පූර්ණ සංවර්ධනය" යන මාතෘකාවෙන් දේශනයක් පවත්වන ලදී. එම අවස්ථාවේදී ඔහු මෝල්ටාවේ උසස් අධ්‍යාපන පද්ධතියේ විශේෂ ලක්ෂණ, තරුණ සවිබල ගැන්වීම, අධ්‍යාපනය සහ නවෝත්පාදනයන් අතර සබඳතාව, ක්‍රීඩාවේ ඒකාබද්ධ සංවර්ධනය යනාදි කරුණු පිළිබඳ ගුරුවරුන් සහ සිසුන්ගේ ප්‍රශ්නවලට පිළිතුරු දුන්නේය.
මෙම දේශනය ආරම්භ වීමට පෙර, බෙයිජිං විදේශ භාෂා විශ්වවිද්‍යාලයේ මෝල්ටිස් භාෂාව ඉගෙන ගන්නා චීන සිසුන් පිරිසක් විසින් ගායනා කරන ලද ගීතය "Xemx"(සූර්යයා) අමුත්තන්ගේ ප්‍රසාදයට ලක් විය. එමෙන් ම ක්ලිෆ්ටන් ග්‍රිමා ප්‍රමුඛ දූත පිරිස බෙයිජිං විදේශ භාෂා විශ්වවිද්‍යාලයේ පිහිටි ලෝක භාෂා කෞතුකාගාරය නැරඹීමට ද ගියහ.
