នៅថ្ងៃទី ១៣ ខែវិច្ឆិកា ព្រះមហាក្សត្រីយានី Letizia នៃប្រទេសអេស្ប៉ាញ បានយាងមកបំពេញព្រះរាជទស្សនកិច្ចនៅសាកលវិទ្យាល័យភាសាបរទេសប៉េកាំង។ ឯកឧត្តម យឹន យូវឈូន សមាជិកក្រុមថ្នាក់ដឹកនាំបក្ស និងជាអនុរដ្ឋមន្ត្រីក្រសួងអប់រំចិន ឯកឧត្តម យ៉ាង តាន អគ្គនាយកនៃអគ្គនាយកដ្ឋានសហប្រតិបត្តិការ និងការផ្លាស់ប្តូរអន្តរជាតិនៃក្រសួងអប់រំចិន ឯកឧត្តម វ៉ាង ទីងហួ លេខាធិការគណបក្សនៃសាកលវិទ្យាល័យភាសាបរទេសប៉េកាំង ឯកឧត្តម ចា វិនជីន សកលវិទ្យាធិការនៃសាកលវិទ្យាល័យភាសាបរទេសប៉េកាំង និងលោកសកលវិទ្យាធិការរង ចាវ កាង បានអញ្ជើញចូលរួមក្នុងព្រឹត្តិការណ៍នេះ។ គ្រូបង្រៀន និងនិស្សិតជាង ៣០០ នាក់ ដែលមកពីផ្នែកភាសាអេស្ប៉ាញនៃមហាវិទ្យាល័យភាសាអេស្ប៉ាញ និងព័រទុយហ្គាល់ មហាវិទ្យាល័យទំនាក់ទំនងអន្តរជាតិ មហាវិទ្យាល័យអប់រំនៃសាកលវិទ្យាល័យភាសាបរទេសប៉េកាំង ព្រមទាំងសាកលវិទ្យាល័យដទៃទៀតនៅទីក្រុងប៉េកាំង បានចូលរួមក្នុងព្រឹត្តិការណ៍នេះ។

នៅពេលចាប់ផ្តើមព្រឹត្តិការណ៍នេះ ព្រះមហាក្សត្រីយានី Letizia រួមជាមួយឯកឧត្តម យឹន យូវឈូន ឯកឧត្តម យ៉ាង តាន ឯកឧត្តម វ៉ាង ទីងហួ និងឯកឧត្តម ចា វិនជីន បានយាងចូលរួម និងចូលរួមជាសាក្សីក្នុងពិធីសម្ពោធផ្លាកសញ្ញារំលឹក ដើម្បីថ្លែងអំណរគុណ និងបង្ហាញពីការគោរពចំពោះគ្រូមកពីប្រទេសអេស្ប៉ាញ ដែលបានមកបង្រៀនភាសាអេស្ប៉ាញនៅសាកលវិទ្យាល័យភាសាបរទេសប៉េកាំង និងសាកលវិទ្យាល័យផ្សេងៗទៀតក្នុងទសវត្សរ៍ឆ្នាំ ១៩៥០។

លោក ឆាង ហ្វូ លាំង ព្រឹទ្ធបុរសនៃមហាវិទ្យាល័យភាសាអេស្ប៉ាញ និងព័រទុយហ្គាល់ សាកលវិទ្យាល័យភាសាបរទេសប៉េកាំង បានណែនាំអំពីប្រវត្តិនៃការអភិវឌ្ឍការបង្រៀន និងការស្រាវជ្រាវភាសាអេស្ប៉ាញនៅសាកលវិទ្យាល័យភាសាបរទេសប៉េកាំង និងសាកលវិទ្យាល័យផ្សេងៗទៀតនៅក្នុងប្រទេសចិន។ កញ្ញា ម៉ា ខឺយីង និស្សិតរៀនភាសាអេស្ប៉ាញ និងលោក អាល់ប៉េថូ និស្សិតរៀនមុខជំនាញទំនាក់ទំនងអន្តរជាតិ បានចូលរួមក្នុងការសន្ទនាជាភាសាអេស្ប៉ាញ និងភាសាចិន ដោយបង្ហាញពីការបំផុសគំនិតគ្នាទៅវិញទៅមក និងភាពស៊ីសង្វាក់គ្នារវាងយុវជនមកពីប្រទេសចិន និងអេស្ប៉ាញនៅតាមផ្លូវនៃការសិក្សាភាសារបស់ពួកគេ។

ព្រះមហាក្សត្រីយានី Letizia បានសម្តែងការចាប់អារម្មណ៍យ៉ាងខ្លាំងចំពោះការស្រាវជ្រាវ និងសមិទ្ធផលផ្លាស់ប្តូរក្នុងការបង្រៀនភាសាអេស្ប៉ាញនៅសាកលវិទ្យាល័យភាសាបរទេសប៉េកាំង ហើយបានសំណេះសំណាលមួយគ្រូបង្រៀន និងនិស្សិតដែលចូលរួមព្រឹត្តិការណ៍នេះ។