រសៀលថ្ងៃទី ១៥ ខែកញ្ញា សាកលវិទ្យាល័យភាសាបរទេសប៉េកាំងបានប្រារព្ធពិធីបើកកម្មវិធីសិក្សាភាសា Tetun។ នេះជាលើកទីមួយដែលសាកលវិទ្យាល័យក្នុងប្រទេសចិនបានបើកកម្មវិធីសិក្សាភាសា Tetun។ លោក ចាវ កាង សមាជិកអចិន្ត្រៃយ៍នៃគណៈកម្មាធិការបក្ស និងជាសកលវិទ្យាធិការរងនៃសាកលវិទ្យាល័យភាសាបរទេសប៉េកាំង និងលោក Rogério Paulo Chaves ទីប្រឹក្សាអប់រំនៃស្ថានទូតទីម័រខាងកើតប្រចាំប្រទេសចិន បានអញ្ជើញចូលរួម និងថ្លែងសុន្ទរកថាក្នុងព្រឹត្តិការណ៍នេះ។ ពិធីនេះធ្វើឡើងក្រោមការសម្របសម្រួលរបស់គ្រូបង្រៀនភាសា Tetun នៅមហាវិទ្យាល័យសិក្សាអាស៊ី។

លោក ចាវ កាង បានចាប់ផ្តើមសុន្ទរកថារបស់លោកជាមួយនឹងការស្វាគមន៍ជាភាសា Tetun ថា "សួស្តី" ។ លោកបានថ្លែងថា យើងអាចស្គាល់គ្នាជិតស្និទ្ធមិនថានៅឆ្ងាយពីគ្នាយ៉ាងណាក៏ដោយ ហើយយើងនៅតែជាអ្នកជិតខាងដែលនៅឆ្ងាយពីគ្នារាប់ពាន់គីឡូម៉ែត្រ។ ទំនាក់ទំនងមិត្តភាពប្រពៃណីរវាងប្រទេសចិន និងទីម័រខាងកើតមានប្រវត្តិដ៏យូរអង្វែង។ ក្រោយពីបានបង្កើតទំនាក់ទំនងការទូតមក ទំនាក់ទំនងទ្វេភាគីទទួលបានការអភិវឌ្ឍច្រើនគួរឱ្យកត់សម្គាល់។ នៅឆ្នាំនេះ ប្រមុខរដ្ឋនៃប្រទេសទីម័រខាងកើតបានអញ្ជើញមកបំពេញទស្សនកិច្ចនៅប្រទេសចិនជាលើកដំបូង ដែលធ្វើឱ្យទំនាក់ទំនងមិត្តភាពរវាងប្រទេសទាំងពីរបន្តរីកចម្រើនឥតឈប់ឈរ។ ការបើកកម្មវិធីបង្រៀនភាសា Tetun នៅសាកលវិទ្យាល័យភាសាបរទេសប៉េកាំងនឹងអាចជួយឱ្យយើងមានការយល់ដឹងកាន់តែស៊ីជម្រៅអំពីភាសា និងវប្បធម៌ទីម័រខាងកើត។ លោកបានលើកទឹកចិត្តឱ្យនិស្សិតទាំងអស់គ្នាខិតខំសិក្សាភាសា ធ្វើជាបេសកជនសម្រាប់ជំរុញការផ្លាស់ប្តូរប្រជាជន និងប្រជាជន ព្រមទាំងចូលរួមចំណែកក្នុងការពង្រឹងចំណងមិត្តភាពរវាងប្រទេសទាំងពីរ។

លោក Rogério Paulo Chaves បានសម្តែងនូវការអបអរសាទរចំពោះការបើកកម្មវិធីសិក្សាភាសា Tetun លើកដំបូងនៅក្នុងសាកលវិទ្យាល័យនៃប្រទេសចិន ហើយបានសម្តែងការស្វាគមន៍ និងជូនពរដល់សិស្សានុសិស្សដែលមានបំណងចង់រៀនភាសា Tetun និងយល់ដឹងអំពីវប្បធម៌ទីម័រខាងកើត។ លោកបានសម្តែងការកោតសរសើរចំពោះសាកលវិទ្យាល័យភាសាបរទេសប៉េកាំង ហើយរំពឹងថាភាគីទាំងពីរនឹងស្វែងរកឱកាសបន្ថែមទៀតដើម្បីពង្រឹងនិងពង្រីកកិច្ចសហប្រតិបត្តិការនាពេលអនាគត។