នៅរសៀលថ្ងៃទី ៣០ ខែមីនា លោកជំទាវ Iliana Ivanova សមាជិកគណៈកម្មាធិការកិច្ចការនវានុវត្តន៍ ការស្រាវជ្រាវ វប្បធម៌ ការអប់រំ និងយុវជននៃក្រុមប្រឹក្សាសហភាពអឺរ៉ុប ដែលមកចូលរួមកិច្ចប្រជុំលើកទី ៦ នៃយន្តការជាន់ខ្ពស់ស្តីពីការផ្លាស់ប្តូរប្រជាជន និងប្រជាជន ចិន-អឺរ៉ុប បានអញ្ជើញមកបំពេញទស្សនកិច្ចនៅសាកលវិទ្យាល័យភាសាបរទេសប៉េកាំង។ ឯកឧត្តម ឆឹន ជា អនុរដ្ឋមន្រ្តីក្រសួងការអប់រំចិន ឯកឧត្តម យ៉ាង តាន អគ្គនាយកនៃអគ្គនាយកដ្ឋានសហប្រតិបត្តិការ និងផ្លាស់ប្តូរអន្តរជាតិនៃក្រសួងការអប់រំចិន ឯកឧត្តម វ៉ាង ទីងហួ លេខាបក្សនៃសាកលវិទ្យាល័យភាសាបរទេសប៉េកាំង បានចូលរួមពិធីទទួលស្វាគមន៍នេះ ដែលមានលោកសាកលវិទ្យាធិការរង ចា វិនជាន ជាអ្នកសម្របសម្រួល។

ក្នុងពិធីទទួលស្វាគមន៍នេះ ឯកឧត្តម ឆឹន ជា បានជូនអំណោយជាសៀវភៅ«សុបិនវិមានក្រហម»ជាភាសាប៊ុលហ្គារី សៀវភៅ«វប្បធម៌ចិន»ជាភាសាអេស្ប៉ាញ៉ុល និងសៀវភៅ«រៀនភាសានិយាយនៃភាសាដាណឺម៉ាក»ដែលចងក្រង និងបោះពុម្ពផ្សាយដោយសាកលវិទ្យាល័យភាសាបរទេសប៉េកាំង ដល់លោកជំទាវ Iliana Ivanova និងភ្ញៀវកិត្តិយសដែលមកពីក្រុមប្រឹក្សាសហភាពអឺរ៉ុប។ ។ ឯកឧត្តម វ៉ាង ទីងហួ និងលោកជំទាវ  Iliana Ivanova បានថ្លែងសុន្ទរកថា។

បន្ទាប់ពីពិធីទទួលស្វាគមន៍នេះ គណៈប្រតិភូដែលដឹកនាំដោយលោកជំទាវ Iliana Ivanova  បានអញ្ជើញទៅទស្សនាការិយាល័យបង្រៀន និងស្រាវជ្រាវភាសាប៊ុលហ្គារីនៃសាកលវិទ្យាល័យភាសាបរទេសប៉េកាំង ដើម្បីស្វែងយល់អំពីការកសាងមុខជំនាញភាសាប៊ុលហ្គារី និងភាសាផ្សេងទៀតរបស់សហភាពអឺរ៉ុប។ ក្រោយមក គណៈប្រតិភូបានធ្វើទស្សនកិច្ចនៅឯសួនច្បារមិត្តភាពចិន-អឺរ៉ុបដែលត្រូវបានសម្ពោធនៅឆ្នាំ ២០១៥ ។