នៅថ្ងៃទី ១៨ ខែកក្កដា ឆ្នាំ ២០២២ វគ្គបណ្តុះបណ្តាលធនធានគ្រូបង្រៀនអន្តរជាតិអំពីលទ្ធិខុងជឺ និងវប្បធម៌ចិនឆ្នាំ ២០២២ ដែលរៀបចំដោយសាកលវិទ្យាល័យភាសាបរទេសប៉េកាំង និងសមាគមលទ្ធិខុងជឺអន្តរជាតិ បានបើកវគ្គជាផ្លូវការ ។ លោក ចាំង សៀជឺ អនុប្រធានសមាគមលទ្ធិខុងជឺអន្តរជាតិ លោក ចាវ កាង សាកលវិទ្យាធិការរងនៃសាកលវិទ្យាល័យភាសាបរទេសប៉េកាំង លោក អាន លឺជឺ អ្នកជំនាញការនៃវិទ្យាស្ថានផ្សព្វផ្សាយអន្តរជាតិ និងសិក្សាស្រាវជ្រាវវប្បធម៌ចិននៃសាកលវិទ្យាល័យភាសាបរទេសប៉េកាំង អនុប្រធានសមាគមលទ្ធិខុងជឺអន្តរជាតិ និងជាទស្សនវិទូប្រៀបធៀបចិន-លោកខាងលិចដ៏ល្បីឈ្មោះលើពិភពលោក ព្រមទាំងអ្នកជំនាញការ និងសិក្ខាកាមដែលមកពីប្រទេសនានា បានអញ្ជើញចូលរួមក្នុងពិធីបើកវគ្គនេះ ។

វគ្គបណ្តុះបណ្តាលនេះនឹងរៀបចំរយៈពេល ១៣ ថ្ងៃ តាមប្រព័ន្ធអនឡាញ ដោយប្រើភាសាចិន និងភាសាអង់គ្លេស ។ គួរបញ្ជាក់ថា សិក្ខាកាមដែលមកពីសាកលវិទ្យាល័យចិន និងបរទេសនៃប្រទេសចំនួន ២៤ សរុបជាង ១៦០ នាក់ រួមមានប្រទេសបាគីស្ថាន ចិន អេស៊ីប អង់គ្លេស អូស្ត្រាលី អាមេរិក ប្រេស៊ីល និងតួកគីជាដើម ។