28-fevral kuni Pekin chet tillari universitetining (PChTU) Yifu o‘quv binosida 2026-yil bahorgi semestr ishlarini rejalashtirish bo‘yicha yig‘ilish bo‘lib o‘tdi. Yig‘ilishda PChTU rahbariyatining barcha a’zolari ishtirok etdi. Unda PChTU partiya qo‘mitasining kotibi Li Hai, partiya qo‘mitasi kotibining o‘rinbosari va rektori Jia Venjian yangi yilda universitet faoliyatining turli yo‘nalishlari bo‘yicha vazifalarni belgilab berdilar.

Xalqaro hamkorlik masalalariga to‘xtalar ekan, Li Hai jahon tillari, jahon madaniyati va global boshqaruv kabi ustuvor yo‘nalishlarga e’tibor qaratish, universitetning tashqi ochiqligi va xalqaro almashinuv ishlarini kompleks tarzda muvofiqlashtirish, dunyoning yetakchi oliy ta’lim muassasalari bilan yuqori saviyadagi va ko‘p qirrali hamkorlikni faol yo‘lga qo‘yish, shu orqali xorijiy hamkorlar bilan qo‘shma ta’lim dasturlarining sifati va samaradorligini oshirish zarurligini ta’kidladi. Shuningdek, u Konfutsiy institutlari faoliyatini barqaror rivojlantirish, “Xitoy ko‘prigi” kabi maxsus loyihalar orqali brend ta’siri va madaniy targ‘ibot salohiyatini samarali kuchaytirish  muhimligini qayd etdi.

O‘z navbatida Jia Venjian xalqaro hamkorlikda yangi ufqlarni ochish zarurligini bildirib, London universiteti Sharqshunoslik va Afrikashunoslik maktabi (SOAS) bilan qo‘shma ta’lim dasturini barqaror va muvaffaqiyatli yo‘lga qo‘yish uchun barcha sa’y-harakatlarni safarbar etish, xalqaro hamkorlikdagi ta’limning yangi modelini, Konfutsiy institutlari uchun yangi platformani hamda xorijiy mutaxassislarni jalb etishga qaratilgan “111 loyihasi” doirasidagi yangi tizimni shakllantirish lozimligini qayd etdi. Shu bilan birga, u uzoq muddatli rejalashtirishni amalga oshirish, istiqbolli strategiyalarni optimallashtirish, milliy manfaatlarga faol xizmat qilish, qo‘shma hamkorlikdagi ta’lim dasturlarining yuqori sifatli rivojlanishiga ko‘maklashish hamda “Xitoyda ta’lim olish” brendi va salohiyatini izchil ilgari surish lozimligini qayd etdi.