ຄະນະພາສາຣັດເຊຍແມ່ນສະຖາບັນທີ່ມີປະຫວັດສາດທີ່ຍາວນານທີ່ສຸດຢູ່ໃນມະຫາວິທະຍາໄລພາສາຕ່າງປະເທດປັກກິ່ງ,ສ້າງຕັ້ງຂຶ້ນໃນປີ 1941.
ຄະນະພາສາຣັດເຊຍສາມາດມອບໃບປະກາດລະດັບປະລິນຍາເອກ ແລະ ປະລິນຍາໂທ, ເຊິ່ງເປັນສາຂາວິຊາອັນສຳຄັນຂອງນະຄອນຫຼວງປັກກິ່ງ. ຮອດເດືອນກັນຍາ ປີ2015 ມີນັກສຶກສາປະລິຍາຕີຈໍານວນ 284 ຄົນ, ນັກສຶກສາປະລິນຍາໂທຈໍານວນ 46 ຄົນ, ນັກສຶກສາປະລິນຍາເອກຈໍານວນ 21 ຄົນ, ນັກສຶກສາເໜືອປະລິນຍາເອກ (Post doctorate)ຈໍານວນ 06 ຄົນ, ນັກສຶກສາຕ່າງປະເທດຈໍານວນ 05 ຄົນ ແລະ ມີພະນັກງານຄູອາຈານຈໍານວນ 23 ທ່ານ ເຊິ່ງໃນນັ້ນມີອາຈານຈໍານວນ 19 ທ່ານ, ພະນັກງານຊ່ວຍການບໍລິຫານຈໍານວນ 04 ທ່ານ, ອາຈານຊີ້ນຳປະລິນຍາເອກຈໍານວນ 05 ທ່ານ, ສາສະດາຈານ(ລວມອາຈານຊີ້ນຳປະລິນຍາເອກ)ຈໍານວນ 08 ທ່ານ, ຮອງສາສະດາຈານຈໍານວນ 08 ທ່ານ, ອາຈານສອນ (lecturer)ຈໍານວນ 04 ທ່ານ, ນັກຊ່ຽວຊານຕ່າງປະເທດ 01 ທ່ານ. ໃນນັ້ນພະນັກງານຄູອາຈານມີ 16 ທ່ານມີລະດັບປະລິນຍາເອກ, ມີອາຈານ 05 ທ່ານໄດ້ຮັບລາງວັນ Pushkin ເຊິ່ງເປັນລາງວັນສູງສຸດໃນວົງການພາສາຣັດເຊຍ ( ມາຮອດປະຈຸບັນ ມີແຕ່ 20 ທ່ານໄດ້ລາງວັນນີ້ໃນ ສປຈີນ ) ແລະ ອາຈານຫຼາຍທ່ານໄດ້ລາງວັນໃຫຍ່ຫຼາຍເທື່ອຄື: ລາງວັນປະທານນາທິບໍດີ, ລາງວັນມິດຕະພາບ, ລາງວັນວັນນະຄະດີ Gorky ແລະ ອື່ນໆ. ປຶ້ມຮຽນພາສາຣັດເຊຍ ທີ່ຮຽບຮຽງໂດຍທິມສິດສອນ ເຄີຍໄດ້ລາງວັນລະດັບນະຄອນຫຼວງປັກກິ່ງ ແລະ ລະດັບຊາດ ແລະນຳໃຊ້ໃນ ມະຫາວິທະຍາໄລຮ້ອຍກວ່າແຫ່ງ.
ທິດທາງການສຶກສາ ແລະ ຄົ້ນຄວ້າຂອງຄະນະພາສາຣັດເຊຍລວມທັງ ພາສາສາດ, ວັນນະຄະດີ,ການແປພາສາ, ວັດທະນະທຳ,ການຄົ້ນຄວ້າພາກພື້ນ, ສາຍພົວພັນສາກົນ, ການເມືອງສາກົນ,ເສດຖະກິດຣັດເຊຍເປັນຕົ້ນ; ຫຼັກສູດການສອນລະດັບປະລິນຍາຕີປະກອບດ້ວຍການປະຕິບັດຕົວຈິງ, ໄວຍະກອນ, ການຟັງ,ການອ່ານ,ການແປ (ການເວົ້າ ແລະ ການຂຽນ) ຂຽນບົດ, ແລະ ຫຼັກສູດຄວາມຮູ້ວິຊາສະເພາະເຊິ່ງມີ: ພູມສາດປະເທດຣັດເຊຍ,ປະຫວັດສາດ ວັດທະນະທຳ, ວັນນະຄະດີ,ສັງຄົມ, ພາກພື້ນ, ເສດຖະກິດ-ການຄ້າຣັດເຊຍ, ການຕ່າງປະເທດ ແລະ ອື່ນໆ. ນັກສຶກສາປະລິນຍາໂທມີ 02 ປະເພດຄື: ປະເພດທິດສະດີ ແລະ ປະເພດປະຕິບັດຕົວຈິງ(ນັກສຶກສາປະລິນຍາໂທວິຊາສະເພາະ) ທິດທາງການສຶກສາຂອງ ນັກສຶກສາປະລິນຍາໂທ ແລະ ປະລິນຍາເອກຂອງປະເພດທິດສະດີມີ: ພາສາຣັດເຊຍສະໄໝໃໝ່, ວັນນະຄະດີຣັດເຊຍ, ວັດທະນະທຳ-ສັງຄົມ ແລະ ການສຶກສາພາກພື້ນ.
ຄຸນນະພາບການບຳລຸງສ້າງບຸກຄະລາກອນຂອງພາສາຣັດເຊຍແມ່ນມີຄວາມພົ້ນເດັ່ນ. ນັກສຶກສາມີຄວາມຮູ້ ແລະ ຄວາມສາມາດດ້ານວິຊາສະເພາະທີ່ດີເດັ່ນ, ອັດຕາຜ່ານການສອບເສັງແລະອັດຕາຜູ້ໄດ້ຄະແນນທີ່ດີ ໃນການສອບເສັງລະດັບວິຊາສະເພາະ ລະດັບ 4 ແລະ ລະດັບ 8 ເຊິ່ງຈັດຢູ່ແຖວໜ້າພາຍໃນປະເທດຕະຫຼອດມາ. ໃນບັນດາການແຂ່ງຂັນວິຊາພາສາຣັດເຊຍລະຫວ່າງບັນດາມະຫາວິທະຍາໄລຂອງຈີນ, ນັກສຶກສາປະລິນຍາຕີ ແລະ ໂທຂອງຄະນະພາສາຣັດເຊຍພວກຂ້າພະເຈົ້າໄດ້ຮັບຜົນສຳເລັດອັນຈົບງາມ. ໃນດ້ານການບຳລຸງສ້າງນັກສຶກສາປະລິນຍາເອກ ສະຖາບັນເຮົາໄດ້ບຳລຸງສ້າງອາຈານ ແລະ ພະນັກງານບໍລິຫານລະດັບສູງຈຳນວນຫຼວງຫຼາຍ.
ຄຽງຄູ່ກັບສາຍພົວພັນຄູ່ຮ່ວມຍຸດທະສາດ ລະຫວ່າງສອງປະເທດຈີນ-ຣັດເຊຍລົງເລິກຢ່າງຮອບດ້ານ ແລະ ພ້ອມກັບການພັດທະນາຢ່າງໝັ້ນຄົງຂອງສາຍພົວພັນດ້ານເສດຖະກິດການຄ້າລະຫວ່າງສອງປະເທດ,ການປະກອບອາຊີບຂອງນັກສຶກສາພາສາຣັດເຊຍນັບມື້ນັບດີຂຶ້ນ ແລະ ອັດຕາການປະກອບອາຊີບແມ່ນເກືອບ 100% ໃນຫຼາຍປີຜ່ານມາ, ຫຼັງຈາກການຈົບຮຽນ ນັກສຶກສາຈະໄດ້ເຮັດວຽກຢູ່ໃນຫຼາຍຂົງເຂດ, ສ່ວນຫຼາຍແມ່ນເຂົ້າເຮັດວຽກຢູ່ບັນດາກະຊວງທະບວງກົມ ລັດວິສາຫະກິດ, ບໍລິສັດຂະໜາດໃຫຍ່ຂອງຣັດເຊຍປະຈຳ ຈີນ ແລະ ອື່ນໆ.
ຄະນະພາສາຣັດເຊຍມີສາຍພົວພັນການຮ່ວມມືກັບບັນດາມະຫາວິທະຍາໄລ ຄື: ມະຫາວິທະຍາໄລ Moscow, ມະຫາວິທະຍາໄລພາສາ Moscow, ສະຖາບັນການພົວພັນສາກົນ Moscow, ສະຖາບັນພາສາຣົດເຊຍ Pushkin, ມະຫາວິທະຍາໄລມິດຕະພາບປະຊາຊົນຣົດເຊຍ, ມະຫາວິທະຍາໄລ Saint-Petersburg ແຫ່ງຊາດຣົດເຊຍ ແລະອື່ນໆ. ຄະນະວິຊາໄດ້ຈັດຕັ້ງນັກສຶກສາ ແລະ ອາຈານໄປຮຽນຢູ່ ບັນດາມະຫະວິທະຍາໄລ ທີ່ກ່າວມາຂ້າງເທິງນັ້ນໃນແຕ່ລະປີ. ພ້ອມນັ້ນ ຄະນະວິຊາຍັງຮັບເອົາ ນັກສຶກສາລະດັບປະລິນຍາຕີ ແລະ ປະລິນຍະໂທຂອງຕ່າງປະເທດທີ່ມາຮຽນພາສາຣັດເຊຍອີກດ້ວຍ.
ເມື່ອປະເຊີນໜ້າກັບການທ້າທາຍຈາກການຫັນປ່ຽນ ແລະ ຍົກລະດັບການສຶກສາໃນສະໄໝໃໝ່ຂອງປະຫວັດສາດ,ຄະນະວິຊາມີເປົ້າໝາຍການບົ່ມສ້າງບຸກຄະລາກອນໂດຍມີລັກສະນະພິເສດຂອງຈີນ ແລະ ມີຮູບແບບແລະວິທີການສິດສອນພາສາ ຕ່າງປະເທດທີ່ຢູ່ລະດັບນໍາໜ້າໃນຈີນ, ຖືເອົາຄວາມສາມາດດ້ານອັກສອນສາດພາສາຣັດເຊຍເປັນສິ່ງອ້າງອີງພື້ນຖານ, ຖືເອົາຄວາມຕ້ອງການດ້ານຍຸດທະສາດຂອງປະເທດ ແລະ ການພັດທະນາ ເສດຖະກິດ-ສັງຄົມຂອງພາກພື້ນເປັນຈຸດປະດິດສ້າງໃໝ່ແລະຈຸດໜັກແຫ່ງການພັດທະນາ,ສຸມໃສ່ການບຳລຸງສ້າງ ແລະ ພັດທະນາ ຜູ້ແປພາສາລະດັບສູງ,ຜູ້ມີຄວາມສາມາດດ້ານການຄົ້ນຄວ້າໃນພາກພື້ນ ແລະພະນັກງານຜູ້ບໍລິຫານ, ຜູ້ມີຄວາມສາມາດໃນການເຜີຍແຜ່ວັດທະນະທຳຈີນ ແລະຣັດເຊຍ.
