ຄະນະສາຍພົວພັນສາກົນຂອງມະຫາວິທະຍາໄລພາສາຕ່າງປະເທດປັກກິ່ງ ສ້າງຕັ້ງຂຶ້ນໃນປີ 2006, ເຊິ່ງປະກອບດ້ວຍ ພາກວິຊາການຕ່າງປະເທດຂອງຄະນະພາສາອັງກິດ ແລະ ສະຖາບັນຄົ້ນຄວ້າບັນຫາສາກົນໃນເມື່ອກ່ອນ. ໃນປີ 2007 ທ່ານ Li Zhaoxing ອະດີດລັດຖະມົນຕີວ່າການກະຊວງການຕ່າງປະເທດຈີນ ໄດ້ຮັບຕຳແໜງເປັນຄະນະບໍດີກິຕິມະສັກຂອງຄະນະວິຊາ. ຢູ່ໃນຄະນະສາຍພົວພັນສາກົນມີພາກວິຊາການຕ່າງປະເທດ,ພາກວິຊາການເມືອງສາກົນ, ພາກການເມືອງວິທະຍາ ແລະການບໍລິຫານ, ສະຖາບັນຄົ້ນຄວ້າບັນຫາສາກົນ, ສະຖາບັນບັນນາທິການວາລະສານ《ເວທີປຶກສາຫາລືສາກົນ》, ສູນຄົ້ນຄວ້າສັງຄົມສາດ ແລະ ບັນຫາສາກົນ, ສູນຄົ້ນຄວ້າສາຍພົວພັນລະຫວ່າງຕາເວັນອອກ ກັບຕາເວັນຕົກ, ສູນຄົ້ນຄວ້າສະຫະປະຊາຊາດ ແລະ ອົງການຈັດຕັ້ງສາກົນ, ສູນຄົ້ນຄວ້າການຕ່າງປະເທດສາທາລະນະ. ໃນປີ 2009 ຖານພຶດຕິກຳແລະ ຄົ້ນຄວ້າການສຶກສາ ນອກໂຮງຮຽນທີ່ສ້າງຂຶ້ນໂດຍມະຫາວິທະຍາໄລພາສາຕ່າງປະເທດປັກກິ່ງ ແລະ ສະພາສົ່ງເສີມການຄ້າ ສປຈີນ ,ໂດຍຄະນະສາຍພົວພັນສາກົນເປັນຜູ້ດຳເນີນໂຄງການນັ້ນໄດ້ຮັບປະກວດເປັນຖານບຳລຸງສ້າງຜູ້ມີຄວາມຮູ້ຄວາມສາມາດນອກໂຮງຮຽນຂອງນະຄອນຫຼວງປັກກິ່ງ. ໃນປີ 2010 ກະຊວງສຶກສາທິການໄດ້ ຈັດວິຊາການຕ່າງປະເທດຂອງຄະນະສາຍພົວພັນສາກົນໃຫ້ເປັນຈຸດພັດທະນາວິຊາສະເພາະທີ່ມີສີສັນພິເສດໃນໂຮງຮຽນຊັ້ນສູງຊຸດທີ6ໃນທົ່ວປະເທດຈີນ,ເຊິ່ງເປັນຄັ້ງທຳອິດຂອງສາຍວິຊາດຽວກັນພາຍໃນປະເທດ.
ຄະນະວິຊາມີພະນັກງານຄູອາຈານ 25 ທ່ານ, ເຊິ່ງໃນບັນດາອາຈານມີ ສາສະດາຈານຈໍານວນ 05 ທ່ານ, ຮອງສາສະດາຈານຈໍານວນ 12 ທ່ານ ແລະ ອາຈານ ຫຼາຍກ່ວາ80%ຈົບລະດັບການສຶກສາປະລິນຍາເອກ ແລະ ໃນນັ້ນມີອາຈານ ຫຼາຍກ່ວາ50% ມີປະສົບການຮຽນຢູ່ຕ່າງປະເທດເປັນເວລາໜຶ່ງປີຂຶ້ນໄປ. ນອກນັ້ນ ຄະນະວິຊາຍັງເຊື້ອເຊີນຊ່ຽວຊານຕ່າງປະເທດໄລຍະຍາວຈໍານວນ 02 ທ່ານ ແລະ ຊ່ຽວຊານຕ່າງປະເທດໄລຍະສັ້ນ, ສາສະດາຈານມາສິດສອນ ແລະ ຍັງມີສາສະດາຈານຮັບເຊີນ, ອາຈານທີ່ສອນວິຊາທີ່ກ່ຽວຂ້ອງຂອງຄະນະວິຊາອື່ນໆພາຍໃນມະຫະວິທະຍາໄລ ແລະ ຜູ້ດຳເນີນວຽກງານການຕ່າງປະເທດທີ່ຮຽນຈົບຈາກມະຫາວິທະຍາໄລພາສາຕ່າງປະເທດປັກກິ່ງ.
ຄະນະວິຊາດສາມາດມອບໃບປະກາສະນິຍາບັດປະລິນຍາໂທວິຊາການເມືອງຂັ້ນໜຶ່ງ ລວມມີ 06 ວິຊາທີ່ເປັນປະລິນຍາໂທຄຶ: ລະບອບການເມືອງຈີນ ແລະ ຕ່າງປະເທດ, ການພົວພັນສາກົນ, ການເມືອງສາກົນ, ການຕ່າງປະເທດ, ການສຶກສາພາກພື້ນ ແລະ ການ ຕ່າງປະເທດສາທາລະນະ, ພ້ອມທັງມີລະດັບປະລິນຍາເອກຂັ້ນສອງຂອງວິຊາ, ຄື:ການພົວພັນສາກົນ ແລະ ການຄົ້ນຄວ້າພາກພື້ນ, ເຊິ່ງໄດ້ເປັນລະບົບຄົບຖ້ວນ ໃນການບຳລຸງສ້າງ ຜູ້ມີຄວາມຮູ້ຄວາມສາມາດ ແຕ່ລະດັບປະລິນຍາຕີ ເຖິງ ລະດັບປະລິນຍາເອກ. ໃນປີ 2014 ມະຫາວິທະຍາໄລໄດ້ອະນຸມັດຄະນະວິຊາໃຫ້ເປີດຮັບນັກສຶກສາສາຂາວິຊາການເມືອງ ແລະ ວິຊາການບໍລິຫານລັດໃນລະດັບປະລິນຍາຕີ. ປະຈຸບັນ ແຜນການຮັບນັກສຶກສາແຕ່ລະປີຂອງຄະນະຄື: ນັກສຶກສາປະລິນຍາຕີ 96 ຄົນ, ນັກສຶກສາຕ່າງປະເທດລະດັບປະລິນຍາຕີ 15-20 ຄົນ, ນັກສຶກສາປະລິນຍາໂທ 40-45 ຄົນ, ນັກສຶກສາຕ່າງປະເທດລະດັບປະລິນຍາໂທ “ປະລິນຍາໂທສາກົນ”15-20 ຄົນ, ນັກສຶກສາປະລິນຍາເອກ 4-6 ຄົນ, ນັກສຶກສາຮຽນສອງສາຂາວິຊາຫຼືວິຊາເພີ່ມມີຈໍານວນ 35-40 ຄົນ.
ໃນດ້ານການກຳນົດຫຼັກສູດຄະນະການພົວພັນສາກົນເອົາໃຈໃສ່ຈຸດພິເສດ ແລະ ສົ່ງເສີມທ່າແຮງຂອງມະຫາວິທະຍາໄລພາສາຕ່າງປະເທດປັກກິ່ງ ແລະ ປະຕິບັດຕາມທິດທາງທີ່ໃຫ້ຄວາມສຳຄັນຕໍ່ສາຂາວິຊາ ແລະ ພາສາຕ່າງປະເທດໄປພ້ອມໆກັນ. ໃນລະດັບປະລິນຍາຕີ, ການສຶກສາໄດ້ແບ່ງອອກເປັນ 03 ປະເພດໃຫຍ່ຕາມພາສາຄື: ຫຼັກສູດການສຶກສາດ້ວຍພາສາຈີນ, ສາຂາວິຊາທີ່ຮຽນດ້ວຍສອງພາສາ ແລະ ພາສາອັງກິດ, ເຊິ່ງແຕ່ລະຫຼັກສູດກິນຈຳນວນປະມານ 1/3. ຄະນະວິຊາຮຽກຮ້ອງໃຫ້ນັກສຶກສາຮຽນເພີ່ມວິຊາພາສາແລະວັນນະຄະດີພາສາອັງກິດເປັນວິຊາທີສອງ ແລະຕ້ອງຜ່ານການສອບເສັງວິຊາພາສາອັງກິດ ລະດັບ 8 (Test for English Majors-Band 8). ໃນເວລານັກສຶກສາຈົບຮຽນ ສາມາດໄດ້ຮັບໃບປະກາສະນີຍະບັດປະລິນຍາສາຂາວິຊາກົດໝາຍ ທີ່ມອບໂດຍ ຫ້ອງການປະລິນຍາຂອງຄະນະລັດຖະບານຈີນ ແລະ ໃບປະກາສະນີຍະບັດປະລິນຍາ ສອງວິຊາ ຄື ສາຂາວິຊາກົດໝາຍ ແລະ ວັນນະຄະດີ ທີ່ມອບໂດຍມະຫາວິທະຍາໄລ. ໃນລະດັບປະລິນຍາໂທ“ໂຄງການປະລິນຍາໂທສາກົນ” ແມ່ນສິດສອນດ້ວຍພາສາອັງກິດໝົດ.
ຄະນະສາຍພົວພັນສາກົນໄດ້ສ້າງຕັ້ງສາຍພົວພັນຮ່ວມມືອັນດີງາມກັບ ມະຫາວິທະຍາໄລ 10 ກວ່າແຫ່ງທັງພາຍໃນ ແລະ ຕ່າງປະເທດ,ເຊິ່ງໃນນັ້ນມີໂຄງການຮຽນປະລິນຍາຕີ ແລະ ໂທຕໍ່ເນື່ອງໃນລະບົບ“3+2”ຮ່ວມກັບມະຫາວິທະຍາໄລ Hawaii ຂອງປະເທດອາເມລິກາ ແລະ ໄດ້ຈັດໂຄງການປະລິນຍາໂທໂດຍໄດ້ຮັບໃບປະກາດສະນີຍະບັດຈາກສອງສະຖາບັນ, ເຊິ່ງ ຮ່ວມກັບ ມະຫາວິທະຍາໄລ Denver ຂອງປະເທດອາເມລິກາ, ມະຫາວິທະຍາໄລ Lancaster ຂອງ ປະເທດອັງກິດ ແລະ ມະຫາວິທະຍາໄລ ມິດຕະພາບປະຊາຊົນ ຂອງປະເທດຣັດເຊຍ ແລະ ມີໂຄງການແລກປ່ຽນ ນັກສຶກສາເປັນໄລຍະສັ້ນກັບມະຫາວິທະຍາໄລການເມືອງໄຕ້ຫວັນ, ມະຫາວິທະຍາໄລ Chung Cheng ໄຕ້ຫວັນ ແລະ ມະຫາວິທະຍາໄລສ້າງຄູໄຕ້ຫວັນ. ພ້ອມນັ້ນ ສະຖາບັນໄດ້ສ້າງກົນໄກແລກປ່ຽນວິຊາການທີ່ດີກັບສະຖາບັນຄົ້ນຄວ້າວິຊາການຕ່າງປະເທດທີ່ກ່ຽວຂ້ອງ ແລະ ແຕ່ລະປີມີອາຈານຫຼາຍທ່ານໄປຮຽນຕໍ່,ທັດສະນະສຶກສາ ແລະ ເຂົ້າຮ່ວມກອງປະຊຸມວິຊາການ ຢູ່ຕ່າງປະເທດ ແລະ ກໍ່ມີນັກຊ່ຽວຊານຕ່າງປະເທດຫຼາຍທ່ານມາແລກປ່ຽນ ແລະ ຢ້ຽມຢາມຢູ່ຄະນະສາຍພົວພັນຕ່າງປະເທດ.
