ເວທີປາໄສການແປພາສາຕ່າງປະເທດພາກພື້ນອາຊີ-ປາຊິຟິກ ຄັ້ງທີ 10 ໄດ້ໄຂຂຶ້ນຢ່າງເປັນທາງການ ໃນວັນທີ 25 ມິຖຸນາ ຜ່ານມາ, ເຊິ່ງເປັນເຈົ້າພາບຮ່ວມ ໂດຍສະມາຄົມນັກແປສາກົນ ແລະ ສະມາຄົມນັກແປແຫ່ງປະເທດຈີນ ແລະ ຈັດຕັ້ງພິທີໂດຍມະຫາວິທະຍາໄລພາສາຕ່າງປະເທດປັກກິ່ງ (ມພຕປ).

ທ່ານ ຕູ້ຈ້ານຢວນ (Du Zhanyuan), ຫົວໜ້າສຳນັກພິມການເຜີຍແຜ່ສາກົນ (CICG), ປະທານສະມາຄົມນັກແປແຫ່ງປະເທດຈີນ, ທ່ານ ຢາງຕັ່ນ (Yang Dan), ຮອງເລຂາຄະນະພັກ, ອະທິການບໍດີ ມພຕປ, ທ່ານ ນາງ Alison Rodriguez, ປະທານສະມາຄົມນັກແປສາກົນ ແລະ ທ່ານ Bart Defrancq, ປະທານສະມາຄົມສະຖາບັນ ແລະ ມະຫາວິທະຍາໄລການແປສາກົນໄດ້ເຂົ້າຮ່ວມ ພ້ອມທັງ ກ່າວຄຳປາໄສໃນເວທີປາໄສດັ່ງກ່າວ. ເວທີປາໄສຄັ້ງນີ້ໄດ້ດຳເນີນໄປພາຍໃຕ້ຫົວຂໍ້ "ການຮ່ວມມືໃນໂລກການແປ: ຍຸກສະໄໝໃໝ່, ການປ່ຽນແປງໃໝ່ ແລະ ຮູບແບບໃໝ່" ໂດຍມີຜູ້ຕາງໜ້າຈາກວົງການການແປ ເກືອບ 300 ທ່ານ ຈາກ 35 ປະເທດ ແລະ ເຂດແຄວ້ນໃນຂອບເຂດທົ່ວໂລກ ເຂົ້າຮ່ວມເວທີປາໄສດັ່ງກ່າວຜ່ານຮູບແບບອອນລາຍ ແລະ ອອບລາຍ.