د بېجينګ د بهرنيو ژبو پوهنتون د چين د پوهنې وزارت تر مستقيمې ادارې لاندې په چين کې له مشهورو پوهنتونونو يو دی چې په ١٩٤١کال کې جوړ شوی. دغه پوهنتون په چين کې د بهرنيو ژبو د زده کړې په ساحه کې يو ډېر لرغونی او عالي پوهنتون دی چې د بهرنيو ژبو شمېر پکې تر ټولو زيات دی. د بېجينګ د بهرنيو ژبو پوهنتون د بېجينګ ښار د های ديان په ناحيه کې موقعيت لري.

په تېرو ٧٤ کلونو کې د بېجينګ د بهرنيو ژبو پوهنتون څخه څه دپاسه نهه لکه تنه محصلين فارغ شوي. دغه پوهنتون اوس يو مهم ښوونيز مرکز دی چې د ديپلوماتانو، ژباړونکو، سوداګرانو، خبريالانو، حقوقپوهانو او بانکدارانو په شمول د مسلکي وتلو کسانو روزنه پکې ترسره کيږي. دغه پوهنتون د ديپلوماتانو د روزنې عمده ځای په توګه ياديږي.